2019-03-06 දිනැති අමාත්‍ය මණ්ඩල තීරණය පිලිබඳ මාධ්‍ය ප්‍රකාශය |
බේරුවල, ගාල්ල, පුරාණවැල්ල/කුඩාවැල්ල යන ධීවර වරායන් සංවර්ධනය කිරීම - දිවයින වටා ධීවර වරායන් 20ක් ඉදි කර ඇති නමුත් දික්ඕවිට ධිවර වරාය හැර අනෙකුත් කිසිදු ධීවර වරායක අඩි 55ක් හෝ ඊට වැඩි ධීවර යාත්‍රා නංගුරම්ලීමට ප්‍රමාණවත් පහසුකම් නොමැති බව නිරීක්ෂණය වී තිබේ. අල්ලා ගන්නා මසුන් ගොඩබෑමට විධිමත් පහසුකම් නොමැති වීම, ගබඩා කිරීමට ප්‍රමාණවත් පහසුකම් නොමැති වීම සහ විධිමත්ව ගබඩා කිරීම සඳහා දැනට භාවිතා වන කුඩා ප්‍රමාණයේ යාත්‍රා තුළ පහසුකම් නොමැති වීම හේතුවෙන් සැලකිය යුතු ප්‍රමාණයක මත්ස්‍ය පසු අස්වනු හානියක් සිදුවන බව නාරා ආයතනය විසින් සිදු කරන ලද අධ්‍යනයකදී නිරීක්ෂණය වී ඇත. එබැවින් පසු අස්වනු හානිය අවම කිරීම හා මත්ස්‍ය අස්වැන්නේ ගුණාත්මකභාවය වර්ධනය කිරීම සඳහා ප්‍රමාණවත් පහසුකම් සැපයිය යුතුව ඇත. මෙම කරුණු සැලකිල්ලට ගෙන ජාත්‍යන්තර ප්‍රමිතීන්ට අනුව හරිත වරාය සංකල්පය යටතේ බේරුවල, ගාල්ල හා පුරාණවැල්ල/කුඩාවැල්ල යන ධීවර වරායන් ප්‍රංශ සංවර්ධන ආයතනයේ අරමුදල් සහය යටතේ සංවර්ධනය කිරීමට සැලසුම් කර ඇත. ඒ අනුව, මෙම වරායන් සංවර්ධනය කිරීම සඳහා සිදු කළ යුතු පාරිසරික හා සමාජයීය අධ්‍යයනය ජාතික ජලජ සම්පත් පර්යේෂණ හා සංවර්ධන ආයතනය වෙතින් සිදු කරවා ගැනීම පිණිස කෘෂිකර්ම, ග්‍රාමීය ආර්ථික කටයුතු, පශු සම්පත් සංවර්ධන, වාරිමාර්ග සහ ධීවර හා ජලජ සම්පත් සංවර්ධන අමාත්‍ය පී.හැරිසන් මැතිතුමා ඉදිරිපත් කළ යෝජනාව අමාත්‍ය මණ්ඩලය විසින් අනුමත කරන ලදී. |
