2019-02-12 දිනැති අමාත්‍ය මණ්ඩල තීරණය පිලිබඳ මාධ්‍ය ප්‍රකාශය |
රත්නපුර නගරයේ අතුරු මාර්ගයක් (Bypass Road) ඉදි කිරීම - කෙළඹ-රත්නපුර-වැල්ලවාය-මඩකළපුව මාර්ගය රත්නපුර නගරය හරහා දිවෙන අතර, රථවාහන තදබදය හේතුවෙන් රථවාහන ගමනාගමනයට දැඩි ප්‍රමාදයන් සිදුවේ. එමඟින් සිදුවන ඉන්ධන නාස්තිය සහ පරිසරය දූෂණය හේතු කොටගෙන ජනතාව දැඩි පීඩනයකට ලක්ව ඇත. වාහන තදබදයට අමතරව නිරන්තරතයෙන් සිදු වන ගංවතුර තත්ත්වය හේතුවෙන්ද මෙම මාර්ගයේ ගමනාගමනයට බාධා සිදුවේ. එයට පිළියමක් ලෙස එම නාගරික ප්‍රදේශය මඟ හැර, ගංවතුර මට්ටමට වඩා ඉහළින් පිහිටන සේ අතුරු මාර්ගයක් ඉදි කිරීමට යෝජනා වී ඇත. ඒ අනුව, වෙරළුපේ සිට වරකාතොට පාලම දක්වා මංතීරු හතරකින් යුත් කිලෝ මීටර 2.2ක අතුරු මාර්ගයක් ඉදි කිරීමටත්, එම අතුරු මාර්ගයේ මීටර 900ක දිගින් යුත් පාලම් 03ක් ඉදි කිරීමටත් මහාමාර්ග හා මාර්ග සංවර්ධන සහ ඛනිජ තෙල් සම්පත් සංවර්ධන අමාත්‍ය කබීර් හෂීම් මැතිතුමා ඉදිරිපත් කළ යෝජනාව අමාත්‍ය මණ්ඩලය විසින් අනුමත කරන ලදී. |
