2019-01-29 දිනැති අමාත්‍ය මණ්ඩල තීරණය පිලිබඳ මාධ්‍ය ප්‍රකාශය |
වී අලෙවි මණ්ඩලය සඳහා අලුතින් ගබඩා ඉදි කිරීම් හා පවතින ගබඩා අලුත්වැඩියා කිරීම - කෘෂිකාර්මික ක්ෂේත්‍රය වැඩිදියුණු කරමින් ගොවීන්‍ට සහන සැලසීම සඳහා එම ක්ෂේත්‍රය හා සම්බන්ධ යටිතල පහසුකම් සංවර්ධනය කිරීමට රජයේ අවධානය යොමු වී ඇත. ඒ අනුව, බෙලිඅත්ත හා මීගහජඳුර යන ප්‍රදේශවල මෙට්‍රික් ටොන් 2,000ක ධාරිතාව සහිත නවීන තාක්ෂණයෙන් යුත් නව වී ගබඩා දෙකක් ඉදි කිරීමටත්, දිවයින පුරා පිහිටි පැරණි වී ගබඩා 39ක් අලුත්වැඩියා කිරීමටත් කෘෂිකර්ම, ග්‍රාමීය ආර්ථික කටයුතු, පශු සම්පත් සංවර්ධන, වාරිමාර්ග සහ ධීවර හා ජලජ සම්පත් සංවර්ධන අමාත්‍ය පී.හැරිසන් මැතිතුමා ඉදිරිපත් කළ යෝජනාව අමාත්‍ය මණ්ඩලය විසින් අනුමත කරන ලදී. |
