2019-01-29 දිනැති අමාත්‍ය මණ්ඩල තීරණය පිලිබඳ මාධ්‍ය ප්‍රකාශය |
රාජ්‍ය ආයතනවල සැලසුම්කරණ හා කළමනාකරණ ශිල්පීය ක්‍රමයක් ලෙස සංවර්ධන ප්‍රතිඵල සඳහා කළමනාකරණය (MfDR) සංකල්පය භාවිත කිරීම - සංවර්ධිත රටවල් මෙන්ම සංවර්ධනය වෙමින් පවතින රටවල්ද නවීන සැලසුම්කරන හා කළමනාකරණ ශිල්පීය ක්‍රමයක් ලෙස සංවර්ධන ප්‍රතිඵල සඳහා කළමනාකරණය යන සංකල්පය ඔවුන්ගේ රාජ්‍ය අංශයේ කළමනාකරණ චක්‍රය සඳහා භාවිත කරනු ලබයි. මෙමඟින් ජාතික තිරසර සංවර්ධනය සඳහා ඉලක්කගත වූ ප්‍රධාන කාර්යසාධන දර්ශක ඉලක්ක කරගනිමින් රාජ්‍ය කළමනාකරණ කටයුතු සිදු කරනු ලබයි. සංවර්ධන ප්‍රතිඵල සඳහා කළමනාකරණය ක්‍රියාවලිය ආරම්භයක් ලෙස අමාත්‍යාංශ 05ක හා පළාත් සභා 02ක නියමු ව්‍යාපෘතියක් ලෙස ආයතන ගත කිරීමටත්, එහි සාර්ථකත්වය මත සියලුම රාජ්‍ය ආයතන ආවරණය වන පරිදි මෙම සංකල්පය භාවිත කිරීමටත් ගරු අග්‍රාමාත්‍ය සහ ජාතික ප්‍රතිපත්ති, ආර්ථික කටයුතු, නැවත පදිංචි කිරීම් හා පුනරුත්ථාපන, උතුරු පළාත් සංවර්ධන, වෘත්තීය පුහුණු හා නිපුණතා සංවර්ධන සහ යෞවන කටයුතු අමාත්‍ය රනිල් වික්‍රමසිංහ මැතිතුමා ඉදිරිපත් කළ යෝජනාව අමාත්‍ය මණ්ඩලය විසින් අනුමත කරන ලදී. |
