2019-01-29 දිනැති අමාත්‍ය මණ්ඩල තීරණය පිලිබඳ මාධ්‍ය ප්‍රකාශය |
දැව නිෂ්පාදනය සඳහා වන වගා කිරීම - ශ්‍රී ලංකාවේ දැව අවශ්‍යතාව වාර්ෂිකව ඉහළ යන බැවින් ඊට සමගාමීව දැව සඳහා දැනට වගා කර ඇති වන වගාවල ඵලදායිතාව ඉහළ නැංවීම හා නව වන වගා ස්ථාපිත කිරීම සිදු කළ යුතු බවට යෝජනා වී ඇත. නව වන වගා ස්ථාපිත කිරීම සඳහා වව්නියාව, කිලිනොච්චි, මුලතිව් හා මන්නාරම දිස්ත්‍රික්කයන්හි හෙක්ටයාර 500ක ඉඩම් හඳුනාගනු ලැබ ඇත. මෙම ව්‍යාපෘතිය ක්‍රියාත්මක කිරීම මඟින් දැව ඉල්ලුම සපුරාලීමට අමතරව ප්‍රාදේශීය වශයෙන් රැකියා ජනනය කිරීම හා වනාවරණය ඉහළ නැංවීම තුළින් ගෝලීය උණුසුම පාලනය කිරීමට දායකත්වයක් ලබා දීමටද අපේක්ෂා කරනු ලබයි. මෙම ව්‍යාපෘතිය ක්‍රියාවට නැංවීම සඳහා අවශ්‍ය ප්‍රතිපාදන වෙන්කරවා ගැනීම පිණිස මහවැලි සංවර්ධන හා පරිසර අමාත්‍යතුමා වශයෙන් අතිගරු ජනාධිපති මෛත්‍රීපාල සිරිසේන මැතිතුමා ඉදිරිපත් කළ යෝජනාව අමාත්‍ය මණ්ඩලය විසින් අනුමත කරන ලදී. |
