2018-07-10 දිනැති අමාත්‍ය මණ්ඩල තීරණය පිලිබඳ මාධ්‍ය ප්‍රකාශය |
බදුල්ල පළාත් මහ රෝහලේ මහල් 10කින් යුතු ගොඩනැඟිල්ලක් ඉදි කිරීම - ඇඳන් 1,493කින් හා වාට්ටු 41කින් සමන්විත බදුල්ල පළාත් මහ රෝහල, ඌව පළාතේ විශාලතම සෞඛ්‍ය සේවා සපයන ආයතනය වේ. එම රෝහලෙහි හදිසි අනතුරු හා හදිසි ප්‍රතිකාර සේවා ව්‍යාපෘතියක් ක්‍රියාත්මක කිරීමටත්, සහාය සායනික සේවාවන් සහිතව හෘද කැතීටකරණ රසායනාගාරයක් ඉදි කිරීමටත් අමාත්‍ය මණ්ඩලය විසින් දැනටමත් අනුමැතිය ලබා දෙනු ලැබ ඇත. ඒ අනුව, ශල්‍ය/වෛද්‍ය වාට්ටු පහසුකම් හා හෘද රෝග පහසුකම් මෙන්ම යෝජිත හදිසි අනතුරු හා හදිසි ප්‍රතිකාර සේවා ඒකකයද ස්ථාපිත කිරීම සඳහා නව දසමහල් ගොඩනැඟිල්ලක් එම රෝහල් පරිශ්‍රයේ ඉදි කිරීමට යෝජනා වී ඇත. ඒ අනුව, රුපියල් මිලියන 3,958.2ක ආයෝජනයක් සහිතව මෙම දසමහල් ගොඩනැඟිල්ල ඉදි කිරීම සඳහා වන කොන්ත්‍රාත්තුව, ඉංජිනේරුමය කාර්යයන් පිළිබඳ මධ්‍යම උපදේශක කාර්යාංශය වෙත පිරිනැමීම පිණිස සෞඛ්‍ය, පෝෂණ හා දේශීය වෛද්‍ය අමාත්‍ය (වෛද්‍ය) රාජිත සේනාරත්න මැතිතුමා ඉදිරිපත් කළ යෝජනාව අමාත්‍ය මණ්ඩලය විසින් අනුමත කරන ලදී. |
