2017-10-03 දිනැති අමාත්‍ය මණ්ඩල තීරණය පිලිබඳ මාධ්‍ය ප්‍රකාශය |
රට තුළ අඛණ්ඩ විදුලි සැපයුමක් සහතික කිරීම සඳහා මෙගාවොට් 100ක අතිරේක විදුලි ධාරිතාවක් ප්‍රසම්පාදනය කිරීම - පසුගිය වර්ෂයේ සහ මේ වර්ෂයේ මේ දක්වා කාලසීමාව තුළ මෝසම් වැසි මඟින් අපේක්ෂිත වර්ෂාපතනය නිසි පරිදි නොලැබීම නිසා විදුලිබලාගාර ආශ්‍රිත ජලාශවල ජල මට්ටම පහත බැස තිබේ. මෙම පසුබිම තුළ ජනතාව වෙත අඛණ්ඩ විදුලිය සැපයුමක් ලබා දීම තහවුරු කිරීමේ අරමුණින්, 2017 ඔක්තෝබර් මාසයේ සිට ඉදිරි මාස 06ක කාලයක් සඳහා මෙගාවොට් 100ක අතිරේක ධාරිතාවක් ජාතික විදුලිබල පද්ධතියට එක් කරගැනීමට තීරණය කරනු ලැබ තිබේ. ඒ සඳහා අවශ්‍ය විදුලි ජනන යන්ත්‍ර බදු පදනම මත ලබාගැනීමට සුදුසු සැපයුම්කරුවෙකු විවෘත ජාත්‍යන්තර ලංසු කැඳවීම මඟින් කෙටිකාලීන පදනම මත තෝරාගැනීම පිණිස විදුලිබල හා පුනර්ජනනීය බලශක්ති අමාත්‍ය රංජිත් සියඹලාපිටිය මැතිතුමා ඉදිරිපත් කළ යෝජනාව අමාත්‍ය මණ්ඩලය විසින් අනුමත කරන ලදී. |
