2017-10-03 දිනැති අමාත්‍ය මණ්ඩල තීරණය පිලිබඳ මාධ්‍ය ප්‍රකාශය |
ධීවර නැංගුරම් පොළවල් ධීවර වරාය නීතිගත සංස්ථාව වෙත පැවරීම - මෙරට වෙරළ තීරයේ ධීවර නැංගුම්පොළ 48ක් පමණ ක්‍රියාත්මක වන අතර එමඟින් වෙරළ ආසන්න ධීවර කටයුතුවල යෙදෙන ධීවර යාත්‍රා 27,000කට පමණ පහසුකම් සපයනු ලැබේ. නව ආර්ථික අවස්ථා ඇති කිරීමට හා ආයෝජනයන් දිරි ගැන්වීමටත්, වෙරළාසන්න ධීවර කර්මාන්තයේ ඵලදායීතාව ඉහළ නැංවීමටත් මසුන් ගොඩබෑමේ හා වෙන්දේසි කිරීමේ දියුණු පහසුකම් සහිතව හා පසු අස්වනු තාක්ෂණය භාවිත කිරීමේ හැකියාව සහිතව ධීවර නැංගුරම්පොළ සංවර්ධනය කළ යුතු වේ. ඒ සඳහා දැනට ධීවර හා ජලජ සම්පත් දෙපාර්තමේන්තුවේ අධීක්ෂණය යටතේ පවතින ධීවර නැංගුරම්පොළ සඳහා මනා කළමනාකරණ ව්‍යූහයක් ඇති කළ යුතුව තිබේ. ඒ අනුව, ධීවර නැංගුරම්පොළවල් කළමනාකරණය, නියාමනය, නඩත්තුව හා සංවර්ධනය පිළිබඳ වගකීම ඒ සඳහා ප්‍රමාණවත් භෞතික හා මානව සම්පත්වලින් සමන්විත ලංකා ධීවර වරාය නීතිගත සංස්ථාව වෙත පැවරීම පිණිස ධීවර හා ජලජ සම්පත් සංවර්ධන අමාත්‍ය මහින්ද අමරවීර මැතිතුමා ඉදිරිපත් කළ යෝජනාව අමාත්‍ය මණ්ඩලය විසින් අනුමත කරන ලදී. |
