2017-08-29 දිනැති අමාත්‍ය මණ්ඩල තීරණය පිලිබඳ මාධ්‍ය ප්‍රකාශය |
හම්බන්තොට මහ රෝහලේ වකුගඩු ප්‍රතිකාර ඒකකය ඉදි කිරීම - හේතුව හඳුනා නොගත් නිදන්ගත වකුගඩු රෝගය බහුල ලෙස ව්‍යාප්ත වී ඇති දිස්ත්‍රික්කයක් ලෙස හම්බන්තොට දිස්ත්‍රික්කය හඳුනාගෙන ඇත. එබැවින්, මුල් අවස්ථාවේදීම මෙම නිදන්ගත වකුගඩු රෝගය හඳුනා ගැනීමට හා ඉන් සිදුවන මරණ වළක්වා ගැනීම සඳහා රුධිර කාන්දුපෙරණ, වාට්ටු, සායන සහ රසායනාගාර පහසුකම් සහිතව වකුගඩු ප්‍රතිකාර ඒකකයක් හම්බන්තොට මහ රෝහලේ ඉදි කිරීමට රජය සැලසුම් කර තිබේ. ඒ අනුව, එම වකුගඩු රෝග ප්‍රතිකාර ඒකකය ඉදි කිරීම සඳහා වූ කොන්ත්‍රාත්තුව අමාත්‍ය මණ්ඩලය විසින් පත් කරන ලද ස්ථාවර ප්‍රසම්පාදන කමිටුවේ නිර්දේශය පරිදි රුපියල් මිලියන 210කට M/s RN Constructions (Pvt) Ltd. වෙත පිරිනැමීම පිණිස සෞඛ්‍ය, පෝෂණ හා දේශීය වෛද්‍ය අමාත්‍ය (වෛද්‍ය) රාජිත සේනාරත්න මැතිතුමා ඉදිරිපත් කළ යෝජනාව අමාත්‍ය මණ්ඩලය විසින් අනුමත කරන ලදී. |
