2017-08-01 දිනැති අමාත්‍ය මණ්ඩල තීරණය පිලිබඳ මාධ්‍ය ප්‍රකාශය |
දුම්රිය මාර්ග ජාලය නඩත්තු කිරීම හා පුළුල් කිරීම - දුම්රිය මගීන්ගේ සංඛ්‍යාව ඉහළ යාමත් සමඟ දුම්රියෙහි බර සහ වේගය සඳහා ඔරොත්තු දෙන පරිදි දුම්රිය පාලම් වැඩිදියුණු කිරීමත්, දුම්රිය මාර්ග ජාලය නිසි පරිදි නඩත්තු කිරීමත් අත්‍යවශ්‍ය වේ. ඒ අනුව, මුහුදුබඩ දුම්රිය මාර්ගය, උතුරු දුම්රිය මාර්ගය සහ මා‍තලේ දුම්රිය මාර්ගය යන දුම්රිය මාර්ගයන්හි පිහිටි වසර 100කට වඩා පැරණි දුම්රිය පාලම් 07ක් ප්‍රතිස්ථාපනය කිරීම, මහව, ගාල්ල හා දෙමටගොඩ ප්‍රදේශවල පිහිටි දුම්රිය හැරවුම් ස්ථාන අලුත්වැඩියා කිරීම සහ දුම්රිය මාර්ග ජාලය නඩත්තු කිරීම සඳහා අවශ්‍ය මෙවලම් හා උපකරණ ලබා දීම පිණිස යු‍රෝ මිලියන 7.6ක ඇස්තමේන්තුගත පිරිවැයකින් ක්‍රියාත්මක කිරීමට යෝජනා වී ඇති ව්‍යාපෘතිය සඳහා ඔස්ට්‍රියානු රජය විසින් සලස‍ා දෙනු ලැබීමට එකඟ වී ඇති සහන ණය සම්බන්ධයෙන් සාකච්ඡා සම්මුති පැවැත්වීමටත්, අදාළ ණය ගිවිසුම්වලට එළඹීමටත් ජාතික ප්‍රතිපත්ති හා ආර්ථික කටයුතු අමාත්‍යතුමා වශයෙන් ගරු අග්‍රාමාත්‍ය රනිල් වික්‍රමසිංහ මැතිතුමා ඉදිරිපත් කළ යෝජනාව අමාත්‍ය මණ්ඩලය විසින් අනුමත කරන ලදී. |
