2015-02-11 දිනැති අමාත්ය මණ්ඩල තීරණය පිලිබඳ මාධ්ය ප්රකාශය |
අධි ආරක්ෂක කලාප යටතේ වන ඉඩම් හා දේපළ නිදහස් කිරීම - යුද සමයේ හමුදා පාලනය යටතේ තිබූ අක්කර 11,639 ක ඉඩම් ප්රමාණයෙන් විශාල ඉඩම් ප්රමාණයක් මේ වන විට නිදහස් කර ඇති අතර, පලාලි ප්රදේශයේ ආරක්ෂාව තහවුරු කිරීම සඳහා ශ්රී ලංකා යුද හමුදාවේ සහ ශ්රී ලංකා ගුවන් හමුදාවේ පාලනය යටතේ අක්කර 6,152 ක භූමිභාගයක් දැනට අධි ආරක්ෂිත කලාපයක් ලෙස පවත්වාගෙන යනු ලැබේ. එම අධි ආරක්ෂිත ප්රදේශයෙන් තවත් අක්කර 1,000 ක් අදියර වශයෙන් නිදහස් කිරීමට හා එහි පළමු අදියර වශයෙන් වලිකාමම් නැඟෙනහිර ප්රාදේශීය ලේකම් කොට්ඨාසයේ ජේ 284-වලලායි ග්රාම නිලධාරි වසමේ පිහිටි අක්කර 220 ක් යුද්ධයෙන් අවතැන් වූ පවුල් 1,022 ක් නැවත පදිංචි කිරීම පිණිස ආදර්ශ ගම්මානයක් පිහිටුවීම සඳහා නිදහස් කිරීම පිණිස ආරක්ෂක අමාත්යතුමා වශයෙන් අතිගරු ජනාධිපතිතුමා ඉදිරිපත් කළ යෝජනාව අමාත්ය මණ්ඩලය විසින් අනුමත කරන ලදී. මේ යටතේ එක් පවුලක් සඳහා පර්චස් 20 ක ඉඩම් කොටසක් සහ නිවාස ඉදි කිරීමට අවශ්ය ආධාරද ලබා දීමට නියමිත අතර, පාසලක්, පෙර පාසලක්, රෝහලක්, ආගමික ස්ථාන, ප්රජා ශාලා සහ අනෙකුත් යටිතල පහසුකම් ඇති කිරීමට ද යෝජිතය. නිදහස් කිරීමට අපේක්ෂිත ඉතිරි අක්කර 780 ද යුද්ධයෙන් අවතැන්වූවන් නැවත පදිංචි කිරීම සඳහා යොදා ගැනීම පිණිස ඉදිරියේදී කටයුතු කරනු ඇත. |