2022-01-18 දිනැති අමාත්‍ය මණ්ඩල තීරණය පිලිබඳ මාධ්‍ය ප්‍රකාශය |
මිල්ලනිය ප්‍රාදේශීය ලේකම් කොට්ඨාසයේ රයිගම හරිත කර්මාන්තපුරයෙන් මැක්සන්ස් බාත්වෙයා (පුද්ගලික) සමාගම වෙත ඉඩම් කොටසක් ලබා දීම - සමස්ත දිවයිනම ආවරණය වන පරිදි ප්‍රාදේශීය ලේකම් කොට්ඨාස මට්ටමින් කර්මාන්ත ස්ථානගත කිරීම හා ව්‍යාපාර සංවර්ධනය කිරීම සඳහා ආයෝජන අවස්ථා ලබා දීමේ විශේෂ වැඩසටහන ක්‍රියාත්මක කිරීම පිණිස 2021 ජුනි මස 07 දින පැවති අමාත්‍ය මණ්ඩල රැස්වීමේදී අනුමැතිය ලබා දී තිබේ. වසර 50ක කාලසීමාවක පළපුරුද්දක් සහිත, ටයිල් නිෂ්පාදන ක්ෂේත්‍රයේ ප්‍රමුඛ සමාගමක් වන මැක්සන්ස් බාත්වෙයා (පුද්ගලික) සමාගම විසින් රුපියල් මිලියන 6,000කට ආසන්න ආයෝජනයක් සහිතව ටයිල්, නානකාමර කට්ටල සහ සනීපාරක්ෂක කට්ටල නිෂ්පාදනය කිරීමේ කර්මාන්තයක් ආරම්භ කිරීම සඳහා ඉඩම් කොටසක් ලබා ගැනීම පිණිස ව්‍යාපෘති යෝජනාවක් ඉදිරිපත් කර ඇත. කළුතර දිස්ත්‍රික්කයේ මිල්ලනිය ප්‍රාදේශීය ලේකම් කොට්ඨාසයේ කර්මාන්ත හා තාක්ෂණ අධි කලාපයක් (රයිගම හරිත කර්මාන්තපුරය) ඉදි කිරීම සඳහා දැනට සංවර්ධනය කරමින් පවතින, ඉඩම් ප්‍රතිසංස්කරණ කොමිෂන් සභාවට අයත් නිව් චැටල් වත්ත ඉඩම් කොටසට යාබදව සංවර්ධනය නොකරන ලද ඉඩම් කොටසින් අක්කර 20ක් අවුරුදු 35ක දීර්ඝකාලීන බදු පදනම මත යෝජිත ව්‍යාපෘතිය සඳහා මැක්සන්ස් බාත්වෙයා (පුද්ගලික) සමාගම වෙත ලබා දීම පිණිස කාර්මාන්ත අමාත්‍යතුමා ඉදිරිපත් කළ යෝජනාව අමාත්‍ය මණ්ඩලය විසින් අනුමත කරන ලදී. |
