2021-11-15 දිනැති අමාත්‍ය මණ්ඩල තීරණය පිලිබඳ මාධ්‍ය ප්‍රකාශය |
තැපැල් කාර්යාල ඉදි කිරීම සඳහා වෙන් කර දී ඇති ඉඩම්වල බහුකාර්ය ව්‍යාපෘති ක්‍රියාත්මක කිරීම - ශ්‍රී ලංකා තැපැල් දෙපාර්තමේන්තුව ප්‍රධාන තැපැල් කාර්යාල 654කින් හා උප තැපැල් කාර්යාල 3,410කින් සමන්විත ජාලයකින් යුක්ත වන අතර මේ වන විට එකී ප්‍රධාන තැපැල් කාර්යාල 654න් 154ක් ම කුලී පදනම මත පුද්ගලික ගොඩනැඟිලිවල පවත්වාගෙන යනු ලබයි. තැපැල් කාර්යාල ගොඩනැඟිලි ඉදි කිරීම සඳහා පළාත් කිහිපයකම ඉඩම් කොටස් වෙන් කර දී ඇති නමුත් දෙපාර්තමේන්තුව සතුව ප්‍රමාණවත් අරමුදල් නොමැති වීම හේතුවෙන් යෝජිත ගොඩනැඟිලි ඉදිකිරීමට නොහැකි වී ඇත. එසේම, තැපැල් දෙපාර්තමේන්තුවේ ආදායම් හා වියදම් අතර පරතරය අවම කර ගැනීම සඳහා දෙපාර්තමේන්තුව විසින් අවධානය යොමු කර ඇති අතර, ඒ යටතේ නව ආදායම් උත්පාදන මාර්ග හඳුනාගැනීමේ අවශ්‍යතාව පෙනී ගොස් ඇත. ඒ අනුව, තැපැල් දෙපාර්තමේන්තුවේ අවශ්‍යතාවන් සඳහා අවශ්‍ය ඉඩකඩ සපුරා ගැනීමට මෙන්ම අතිරේක ආදායම් මාර්ගයක් සලසා ගැනීම පිණිස දෙපාර්තමේන්තුව වෙත වෙන් කර දී ඇති ඉඩම්වල රාජ්‍ය - පෞද්ගලික හවුල්කාරීත්ව ක්‍රමවේදය යටතේ බහුකාර්යය ව්‍යාපෘති ක්‍රියාත්මක කිරීම පිණිස ජනමාධ්‍ය අමාත්‍යතුමා ඉදිරිපත් කළ යෝජනාව අමාත්‍ය මණ්ඩලය විසින් අනුමත කරන ලදී. |
